sukhan varii hamen kab tajribe se aaii hai

Sukhan-varee hamen kab tajribe se aa.ee hai Zabaan men chaashnee dil TooTne se aa.ee hai Jidhar se meraa badan dhoop chaaT kar guzraa Havaa-e-sard usee raaste se aa.ee hai TaDaptaa main huun paseena hai us ke maathe par Shikast-e-dil kee sadaa aa.ine se aa.ee hai Khulaa suboot hai ye dushmanon ke shab-khoon kaa Ki dhuul Thahre hue qaafile se aa.ee hai Safar men saath miraa aur koi kya detaa Havaa bhee meree taraf saamne se aa.ee hai Sahar ne mujh ko 'muzaffar' nahin kiyaa saiqal Miree nazar men chamak ratjage se aa.ee hai