wo roktaa hai mujhe shahr men nikalne se
— Muzaffar Warsi
Wo roktaa hai mujhe shahr men nikalne se
BhaDak uThoon na kaheen aandhiyon men jalne se
Ye tarz-e-talkh-navaa.ee kuchh itnee sahl nahin
Zabaan pe aable paD jaa.en sach ugalne se
Khalaa havaa.ee sahaaron se pur nahin hotaa
Buland hotaa hai insaan kaheen uchhalne se
Khud apne-aap se posheeda rahnaa naa-mumkin
Nazar badaltee nahin aa.ina badalne se
KhaDaa huun main kisee girtee huee faseel pe kya
Tavaazun aur bigaDne lagaa sambhalne se
BaDe khuloos se maangee thee raushnee kee duaa
BaDhaa kuchh aur andheraa charaagh jalne se
LuTaa diyaa jinhen jiitee huee raqam kee tarah
Wo din palaT to na aa.enge haath milne se
ChhaTegee kaise 'muzaffar' siyaahee qismat kee
Nikal to aa.egaa khursheed raat Dhalne se