zindagii khinch gaii mujh se tire abruu kii tarah
— Muzaffar Warsi
Zindagee khinch ga.ee mujh se tire abroo kee tarah
Apne hee khuun kaa pyaasaa huun lab-e-joo kee tarah
Wo sitaaraa jo mire naam se mansoob huaa
Deeda-e-shab men hai ik aakhiree aansoo kee tarah
Sho.ala-e-soz-e-daroon sard huaa jaataa hai
Koi samjhaa.e sabaa ko ki chale loo kee tarah
Koi deevaana uThe khaak uDaane ke liye
Aaj bhee dasht hain phaile hue baazoo kee tarah
Is bhare shahr men kartaa huun havaa se baaten
Paanv paDtaa hai zameen par miraa aahoo kee tarah
Shabnamee haath baDhaa.oon ki khule darvaaza
Bin khile phuul ke zindaan men huun khushboo kee tarah
Chaahte hain jo 'muzaffar' gham-e-hastee se faraar
BaiTh jaa.en wo gaDhaa khod ke saadhoo kee tarah