aaraaish e khayaal bhi ho dil kushaa bhi ho

Aaraa.ish-e-khayaal bhee ho dil-kushaa bhee ho Wo dard ab kahaan jise jee chaahtaa bhee ho Ye kya ki roz ek saa gham ek see umiid Is ranj-e-be-khumaar kee ab intihaa bhee ho Ye kya ki ek taur se guzre tamaam umr Jee chaahtaa hai ab koi tere sivaa bhee ho TuuTe kabhi to khvaab-e-shab-o-roz kaa tilism Itne hujoom men koi chehra nayaa bhee ho Deevaangee-e-shauq ko ye dhun hai in dinon Ghar bhee ho aur be-dar-o-deevaar saa bhee ho Juz dil koi makaan nahin dahr men jahaan Rahzan kaa khauf bhee na rahe dar khulaa bhee ho Har zarra ek mahmil-e-ibrat hai dasht kaa Lekin kise dikhaa.oon koi dekhtaa bhee ho Har shai pukaartee hai pas-e-parda-e-sukoot Lekin kise sunaa.oon koi ham-navaa bhee ho Fursat men sun shaguftagi-e-ghunche kee sadaa Ye wo sukhan nahin jo kisee ne kahaa bhee ho BaiThaa hai ek shakhs mire paas der se Koi bhalaa saa ho to hamen dekhtaa bhee ho Bazm-e-sukhan bhee ho sukhan-e-garm ke liye Taa.oos boltaa ho to jangal haraa bhee ho