avvaliin chaand ne kya baat sujhaaii mujh ko

Avvaleen chaand ne kya baat sujhaa.ee mujh ko Yaad aa.ee tiree angusht-e-hinaa.ee mujh ko Sar-e-aivaan-e-tarab naghma-saraa thaa koee Raat bhar us ne tiree yaad dilaa.ee mujh ko Dekhte dekhte taaron kaa safar khatm huaa So gaya chaand magar niind na aa.ee mujh ko Inhee aankhon ne dikhaa.e ka.ee bharpoor jamaal Inheen aankhon ne shab-e-hijr dikhaa.ee mujh ko Saa.e kee tarah mire saath rahe ranj o alam Gardish-e-vaqt kaheen raas na aa.ee mujh ko Dhoop idhar Dhaltee thee dil Doobtaa jaataa thaa idhar Aaj tak yaad hai wo shaam-e-judaa.ee mujh ko Shahr-e-lahore tiree raunaqen daa.im aabaad Teree galiyon kee havaa kheench ke laa.ee mujh ko