gae dinon kaa suraag le kar kidhar se aayaa kidhar gaya wo

Ga.e dinon kaa suraagh le kar kidhar se aayaa kidhar gaya wo Ajiib maanoos ajnabee thaa mujhe to hairaan kar gaya wo Bas ek motee see chhab dikhaa kar bas ek meeThee see dhun sunaa kar Sitaara-e-shaam ban ke aayaa ba-rang-e-khvaab-e-sahar gaya wo Khushee kee rut ho ki gham kaa mausam nazar use DhoonDtee hai har dam Wo boo-e-gul thaa ki naghma-e-jaan mire to dil men utar gaya wo Na ab wo yaadon kaa chaDhtaa Dariya na fursaton kee udaas barkhaa Yoonhee zaraa see kasak hai dil men jo zakhm gahraa thaa bhar gaya wo Kuch ab sambhalne lagee hai jaan bhee badal chalaa daur-e-aasmaan bhee Jo raat bhaaree thee Tal ga.ee hai jo din kaDaa thaa guzar gaya wo Bas ek manzil hai bul-havas kee hazaar raste hain ahl-e-dil ke Yahee to hai farq mujh men us men guzar gaya main Thahar gaya wo Shikasta-paa raah men khaDaa hoon ga.e dinon ko bulaa raha hoon Jo qaafila meraa ham-safar thaa misaal-e-gard-e-safar gaya wo Miraa too Khoon ho gaya hai paanee sitamgaron kee palak na bheegee Jo naala uTThaa thaa raat dil se na jaane kyuun be-asar gaya wo Wo mai-kade ko jagaane vaalaa wo raat kee niind uDaane vaalaa Ye aaj kya us ke jee men aa.ee ki shaam hote hee ghar gaya wo Wo hijr kee raat kaa sitaara wo ham-nafas ham-sukhan hamaaraa Sadaa rahe us kaa naam pyaaraa sunaa hai kal raat mar gaya wo Wo jis ke shaane pe haath rakh kar safar kiyaa too ne manzilon kaa Tiree galee se na jaane kyuun aaj sar jhukaa.e guzar gaya wo Wo raat kaa be-navaa musaafir wo teraa shaa.ir wo teraa 'naasir' Tiree galee tak to ham ne dekhaa thaa phir na jaane kidhar gaya wo