girafta dil hain bahut aaj tere diivaane
— Nasir Kazmi
Girafta-dil hain bahut aaj tere deevaane
Khuda kare koee tere sivaa na pahchaane
MiTee miTee see umeeden thake thake se khayaal
Bujhe bujhe se nigaahon men gham ke afsaane
Hazaar shukr ki ham ne zabaan se Kuch na kahaa
Ye aur baat ki poochhaa na ahl-e-Dunya ne
Ba-qadr-e-tishna-labee pursish-e-wafa na huee
Chhalak ke rah ga.e teree nazar ke paimaane
Khayaal aa gaya maanoos rahguzaaron kaa
PalaT ke aa ga.e manzil se tere deevaane
Kahaan hai too ki tire intizaar men ai dost
Tamaam raat sulagte hain dil ke veeraane
Umeed-e-pursish-e-gham kis se keejiye 'naasir'
Jo apne dil pe guzartee hai koee kya jaane