ishq jab zamzama pairaa hogaa

Ishq jab zamzama-pairaa hogaa Husn khud mahv-e-tamaashaa hogaa Sun ke aavaaza-e-zanjeer-e-sabaa Qafas-e-ghuncha kaa dar vaa hogaa Jaras-e-shauq agar saath rahi Har-nafas shahpar-e-anqaa hogaa Daa.im aabaad rahegee dunya Ham na honge koi ham saa hogaa Kaun dekhegaa tuloo-e-khurshee Zarra jab deeda-e-beenaa hogaa Ham tujhe bhuul ke khush baiThe hain Ham saa bedard koi kya hogaa Phir sulagne lagaa sahraa-e-khayaal Abr ghir kar kaheen barsaa hogaa Phir kisee dhyaan ke sad-raahe par Dil-e-hairat-zadaa tanhaa hogaa Phir kisee sub.h-e-tarab kaa jaadoo Parda-e-shab se huvaidaa hogaa Gul-zameenon ke khunuk ramnon men Jashn-e-raamish-garee barpaa hogaa Phir na.ee rut kaa ishaara paa kar Wo saman-boo chaman-aaraa hogaa Gul-shab-taab kee khushboo le kar Ablaq-e-sub.h ravaana hogaa Phir sar-e-shaakh-e-shuaa-e-khursheed Nik.hat-e-gul kaa baseraa hogaa Ik sadaa sang men taDpee hogee Ik sharar phuul men larzaa hogaa Tujh ko har phuul men uryaan sote Chaandnee-raat ne dekhaa hogaa Dekh kar aa.ina-e-aab-e-ravaan Patta patta lab-e-goyaa hogaa Shaam se soch raha hoon 'naasir' Chaand kis shahr men utraa hogaa