kisi kalii ne bhi dekhaa na aankh bhar ke mujhe
— Nasir Kazmi
Kisee kalee ne bhee dekhaa na aankh bhar ke mujhe
Guzar ga.ee jaras-e-gul udaas kar ke mujhe
Main so raha thaa kisee yaad ke shabistaan men
Jagaa ke chhoD ga.e qaafile sahar ke mujhe
Main ro raha thaa muqaddar kee sakht raahon men
UDaa ke le ga.e jaadoo tiree nazar ke mujhe
Main tere dard kee tughyaaniyon men Doob gaya
Pukaarte rahe taare ubhar ubhar ke mujhe
Tire firaaq kee raaten kabhi na bhoolengee
Maze mile unheen raaton men umr bhar ke mujhe
Zaraa see der Thaharne de ai gham-e-Dunya
Bulaa raha hai koi baam se utar ke mujhe
Phir aaj aa.ee thee ik mauja-e-havaa-e-tarab
Sunaa ga.ee hai fasaane idhar udhar ke mujhe