nae kapde badal kar jaon kahaan aur baal banaauun kis ke liye
— Nasir Kazmi
Na.e kapDe badal kar jaa.oon kahaan aur baal banaa.oon kis ke liye
Wo shakhs to shahr hee chhoD gaya main baahar jaa.oon kis ke liye
Jis dhoop kee dil men ThanDak thee wo dhoop usee ke saath ga.ee
In jaltee baltee galiyon men ab khaak uDaa.oon kis ke liye
Wo shahr men thaa to us ke liye auron se bhee milnaa paDtaa thaa
Ab aise-vaise logon ke main naaz uThaa.oon kis ke liye
Ab shahr men us kaa badal hee naheen koee vaisaa jaan-e-ghazal hee naheen
Aivaan-e-ghazal men lafzon ke gul-daan sajaa.oon kis ke liye
Muddat se koee aayaa na gaya sunsaan paDee hai ghar kee fazaa
In khaalee kamron men 'naasir' ab sham.a jalaa.oon kis ke liye