safar e manzil e shab yaad nahin

Safar-e-manzil-e-shab yaad naheen Log rukhsat hue kab yaad naheen Avvaleen qurb kee sarshaaree men Kitne armaan the jo ab yaad naheen Dil men har vaqt chubhan rahtee thee Thee mujhe kis kee talab yaad naheen Wo sitaaraa thee ki shabnam thee ki phuul Ek soorat thee ajab yaad naheen Kaisee veeraan hai guzar-gaah-e-khayaal Jab se wo aariz o lab yaad naheen Bhoolte jaate hain maazee ke dayaar Yaad aa.en bhee to sab yaad naheen Aisa uljhaa hoon gham-e-Dunya men Ek bhee khvaab-e-tarab yaad naheen Rishta-e-jaan thaa kabhee jis kaa khayaal Us kee soorat bhee to ab yaad naheen Ye haqeeqat hai ki ahbaab ko ham Yaad hee kab the jo ab yaad naheen Yaad hai sair-e-charaaghaan 'naasir' Dil ke bujhne kaa sabab yaad naheen