tire khayaal se lo de uthii hai tanhaaii

Tire khayaal se lo de uThee hai tanhaa.ee Shab-e-firaaq hai yaa teree jalva-aaraa.ee Too kis khayaal men hai manzilon ke shaidaa.ee Unhen bhee dekh jinhen raaste men niind aa.ee Pukaar ai jaras-e-kaarvaan-e-sub.h-e-tarb BhaTak rahe hain andheron men tere saudaai Thahar ga.e hain sar-e-raah khaak uDaane ko Musaafiron ko na chheD ai havaa-e-sahraa.ee Rah-e-hayaat men Kuch marhale to dekh liye Ye aur baat tiree aarzoo na raas aa.ee Ye saaniha bhee mohabbat men baar-haa guzraa Ki us ne haal bhee poochhaa to aankh bhar aa.ee Dil-e-fasurda men phir dhaDkanon kaa shor uThaa Ye baiThe baiThe mujhe kin dinon kee yaad aa.ee Main sote sote ka.ee baar chaunk chaunk paDaa Tamaam raat tire pahluon se aanch aa.ee Jahaan bhee thaa koi fitna taDap ke jaag uThaa Tamaam hosh thee mastee men teree Angdhaai Khulee jo aankh to Kuch aur hee samaan dekhaa Wo log the na wo jalse na shahr-e-raanaa.ee Wo taab-e-dard wo sauda-e-intizaar kahaan Unhee ke saath ga.ee taaqat-e-shakebaa.ee Phir us kee yaad men dil be-qaraar hai 'naasir' BichhaD ke jis se huee shahr shahr rusvaa.ee