tuu jab mere ghar aayaa thaa
— Nasir Kazmi
Too jab mere ghar aayaa thaa
Main ik sapnaa dekh raha thaa
Tere baalon kee khushboo se
Sara aangan mahak raha thaa
Chaand kee dheemee dheemee zau men
Saanvlaa mukhDaa lau deta thaa
Teree niind bhee uDee uDee thee
Main bhee Kuch Kuch jaag raha thaa
Mere haath bhee sulag rahe the
Teraa maathaa bhee jaltaa thaa
Do roohon kaa pyaasaa baadal
Garaj garaj kar baras raha thaa
Do yaadon kaa chaDhtaa Dariya
Ek hee saagar men girtaa thaa
Dil kee kahaanee kahte kahte
Raat kaa aanchal bhiig chalaa thaa
Raat ga.e soyaa thaa lekin
Tujh se pahle jaag uThaa thaa