wo dil navaaz hai lekin nazar shanaas nahin
— Nasir Kazmi
Wo dil-navaaz hai lekin nazar-shanaas naheen
Miraa ilaaj mire chaara-gar ke paas naheen
TaDap rahe hain zabaan par ka.ee savaal magar
Mire liye koee shaayaan-e-iltimaas naheen
Tire jilau men bhee dil kaanp kaanp uThtaa hai
Mire mizaaj ko aasoodgee bhee raas naheen
Kabhee kabhee jo tire qurb men guzaare the
Ab un dinon kaa tasavvur bhee mere paas naheen
Guzar rahe hain ajab marhalon se deeda-o-dil
Sahar kee aas to hai zindagee kee aas naheen
Mujhe ye Dar hai tiree aarzoo na miT jaa.e
Bahut dinon se tabee.at miree udaas naheen