yaad aataa hai roz o shab koi
— Nasir Kazmi
Yaad aataa hai roz o shab koee
Ham se rooThaa hai be-sabab koee
Lab-e-joo Chaaon men darakhton kee
Wo mulaaqaat thee ajab koee
Jab tujhe pahlee baar dekhaa thaa
Wo bhee thaa mausam-e-tarab koee
Kuch khabar le ki teree mahfil se
Duur baiThaa hai jaan-ba-lab koee
Na gham-e-zindagee na dard-e-firaaq
Dil men yoonhee see hai talab koee
Yaad aatee hain duur kee baaten
Pyaar se dekhtaa hai jab koee
ChoT khaa.ee hai baar-haa lekin
Aaj to dard hai ajab koee
Jin ko miTnaa thaa miT chuke 'naasir'
Un ko rusvaa kare na ab koee