apnii marzii se kahaan apne safar ke ham hain
— Nida Fazli
Apnee marzee se kahaan apne safar ke ham hain
Rukh havaaon kaa jidhar kaa hai udhar ke ham hain
Pahle har chiiz thee apnee magar ab lagtaa hai
Apne hee ghar men kisee doosre ghar ke ham hain
Vaqt ke saath hai miTTee kaa safar sadiyon se
Kis ko ma.aloom kahaan ke hain kidhar ke ham hain
Chalte rahte hain ki chalnaa hai musaafir kaa naseeb
Sochte rahte hain kis raahguzar ke ham hain
Ham vahaan hain jahaan Kuch bhee naheen rasta na dayaar
Apne hee kho.e hue shaam o sahar ke ham hain
Gintiyon men hee gine jaate hain har daur men ham
Har qalamkaar kee be-naam khabar ke ham hain