be naam saa ye dard thahar kyuun nahin jaataa
— Nida Fazli
Be-naam saa ye dard Thahar kyuun nahin jaataa
Jo biit gaya hai wo guzar kyuun nahin jaataa
Sab Kuch to hai kya DhoonDhtee rahtee hain nigaahen
Kya baat hai main vaqt pe ghar kyuun nahin jaataa
Wo ek hee chehra to nahin saare jahaan men
Jo duur hai wo dil se utar kyuun nahin jaataa
Main apnee hee uljhee huee raahon kaa tamaasha
Jaate hain jidhar sab main udhar kyuun nahin jaataa
Wo khvaab jo barson se na chehra na badan hai
Wo khvaab havaaon men bikhar kyuun nahin jaataa