dhoop men niklo ghataaon men nahaa kar dekho
— Nida Fazli
Dhoop men niklo ghaTaaon men nahaa kar dekho
Zindagee kya hai kitaabon ko haTaa kar dekho
Sirf aankhon se hee dunya nahin dekhee jaatee
Dil kee dhaDkan ko bhee beenaa.ee banaa kar dekho
Pattharon men bhee zabaan hotee hai dil hote hain
Apne ghar ke dar-o-deevaar sajaa kar dekho
Wo sitaara hai chamakne do yoonhee aankhon men
Kya zarooree hai use jism banaa kar dekho
Faasla nazron kaa dhoka bhee to ho saktaa hai
Wo mile yaa na mile haath baDhaa kar dekho