girjaa men mandiron men azaanon men bat gaya
— Nida Fazli
Girjaa men mandiron men azaanon men baT gaya
Hote hee sub.h aadmee khaanon men baT gaya
Ik 'ishq naam kaa jo parinda khalaa men thaa
Utraa jo shahr men to dukaanon men baT gaya
Pahle talaashaa khet phir Dariya kee khoj kee
Baaqee kaa vaqt gehoon ke daanon men baT gaya
Jab tak thaa aasmaan men sooraj sabhee kaa thaa
Phir yuun huaa wo chand makaanon men baT gaya
Hain taak men shikaaree nishaana hain bastiyaan
'aalam tamaam chand machaanon men baT gaya
Khabron ne kee musavvaree khabren ghazal baneen
Zinda lahoo to tiir kamaanon men baT gaya