yaqiin chaand pe suuraj men e tibaar bhi rakh
— Nida Fazli
Yaqeen chaand pe suraj men aitbaar bhee rakh
Magar nigaah men thoDaa saa intizaar bhee rakh
Khuda ke haath men mat saunp saare kaamon ko
Badalte waqt pe kuch apna ikhtiyaar bhee rakh
Ye hee lahoo hai shahaadat ye hee lahoo paanee
Khizaan naseeb sahee zehn men bahaar bhee rakh
Gharon ke taaqon men gul-daste yuun nahin sajte
Jahaan hain phuul vaheen aas-paas khaar bhee rakh
PahaaD goonjen nadee gaa.e ye zarooree hai
Safar kaheen kaa ho dil men kisee kaa pyaar bhee rakh