hijr karte yaa koi vasl guzaaraa karte

Hijr karte yaa koi vasl guzaaraa karte Ham bahar-haal basar khvaab tumhaaraa karte Ek aisi bhee ghaDee ishq men aa.ee thee ki ham Khaak ko haath lagaate to sitaaraa karte Ab to mil jaao hamen tum ki tumhaaree khaatir Itnee duur aa ga.e dunya se kinaaraa karte Mehv-e-aaraa.ish-e-rukh hai wo qayaamat sar-e-baam Aankh agar aa.eena hotee to nazaaraa karte Ek chehre men to mumkin nahin itne chehre Kis se karte jo koi ishq dobaaraa karte Jab hai ye khaana-e-dil aap kee khalvat ke liye Phir koi aa.e yahaan kaise gavaaraa karte Kaun rakhtaa hai andhere men diyaa aankh men khvaab Teree jaanib hee tire log ishaaraa karte Zarf-e-aa.eena kahaan aur tiraa husn kahaan Ham tire chehre se aa.eena sanvaaraa karte Hijr karte ya koi wasl guzara karte Hum bahar-haal basar KHwab tumhaara karte Ek aisi bhi ghaDi ishq mein aai thi ki hum KHak ko hath lagate to sitara karte Ab to mil jao hamein tum ki tumhaari KHatir Itni dur aa gae duniya se kinara karte Mehw-e-araish-e-ruKH hai wo qayamat sar-e-baam Aankh agar aaina hoti to nazara karte Ek chehre mein to mumkin nahin itne chehre Kis se karte jo koi ishq dobara karte Jab hai ye KHana-e-dil aap ki KHalwat ke liye Phir koi aae yahan kaise gawara karte Kaun rakhta hai andhere mein diya aankh mein KHwab Teri jaanib hi tere log ishaara karte Zarf-e-aina kahan aur tera husn kahan Hum tere chehre se aaina sanwara karte