mire khuda mujhe wo taab e nai navaaii de
— Obaidullah Aleem
Mire khuda mujhe wo taab-e-nai-navaa.ee de
Main chup rahoon bhee to naghma miraa sunaa.ee de
Gadaa-e-koo-e-sukhan aur tujh se kya maange
Yahee ki mamlikat-e-sher kee khuda.ee de
Nigaah-e-dahr men ahl-e-kamaal ham bhee hon
Jo likh rahe hain wo Dunya agar dikhaa.ee de
Chhalak na jaaon kaheen main vajood se apne
Hunar diyaa hai to phir zarf-e-kibriyaa.ee de
Mujhe kamaal-e-sukhan se navaazne vaale
Samaa.aton ko bhee ab zauq-e-aashnaa.ee de
Numoo-pazeer hai ye shola-e-navaa to ise
Har aane vaale zamaane kee peshvaa.ee de
Koee kare to kahaan tak kare maseehaa.ee
Ki ek zakhm bhare doosraa duhaa.ee de
Main ek se kisee mausam men rah nahin saktaa
Kabhee visaal kabhi hijr se rihaa.ee de
Jo ek khvaab kaa nashsha ho kam to aankhon ko
Hazaar khvaab de aur jur.at-e-rasaa.ee de
Mere KHuda mujhe wo tab-e-nai-nawai de
Main chup rahun bhi to naghma mera sunai de
Gada-e-ku-e-suKHan aur tujh se kya mange
Yahi ki mamlikat-e-sher ki KHudai de
Nigah-e-dahr mein ahl-e-kamal hum bhi hon
Jo likh rahe hain wo duniya agar dikhai de
Chhalak na jaun kahin main wajud se apne
Hunar diya hai to phir zarf-e-kibriyai de
Mujhe kamal-e-suKHan se nawazne wale
Samaaton ko bhi ab zauq-e-ashnai de
Numu-pazir hai ye shola-e-nawa to ise
Har aane wale zamane ki peshwai de
Koi kare to kahan tak kare masihai
Ki ek zaKHm bhare dusra duhai de
Main ek se kisi mausam mein rah nahin sakta
Kabhi visal kabhi hijr se rihai de
Jo ek KHwab ka nashsha ho kam to aankhon ko
Hazar KHwab de aur jurat-e-rasai de