aks e khushbuu hoon bikharne se na roke koi
— Parveen Shakir
Aks-e-khushboo hoon bikharne se na roke koee
Aur bikhar jaa.oon to mujh ko na sameTe koee
Kaanp uThtee hoon main ye soch ke tanhaa.ee men
Mere chehre pe tiraa naam na paDh le koee
Jis tarah khvaab mire ho ga.e reza reza
Us tarah se na kabhee Toot ke bikhre koee
Main to us din se hiraasaan hoon ki jab hukm mile
Khushk phoolon ko kitaabon men na rakkhe koee
Ab to is raah se wo shakhs guzartaa bhee naheen
Ab kis ummeed pe darvaaze se jhaanke koee
Koee aahaT koee awaaz koee chaap naheen
Dil kee galiyaan baDee sunsaan hain aa.e koee