apnii rusvaaii tire naam kaa charchaa dekhuun

Apnee rusvaa.ee tire naam kaa charchaa dekhoon Ik zaraa sher kahoon aur main kya kya dekhoon Niind aa jaa.e to kya mahfilen barpaa dekhoon Aankh khul jaa.e to tanhaa.ee kaa sahraa dekhoon Shaam bhee ho ga.ee dhundlaa ga.iin aankhen bhee miree Bhoolne vaale main kab tak tiraa rastaa dekhoon Ek ik kar ke mujhe chhoD ga.iin sab sakhiyaan Aaj main khud ko tiree yaad men tanhaa dekhoon Kaash sandal se miree maang ujaale aa kar Itne ghairon men vahee haath jo apna dekhoon Too miraa Kuch naheen lagtaa hai magar jaan-e-hayaat Jaane kyuun tere liye dil ko dhDaknaa dekhoon Band kar ke miree aankhen wo sharaarat se hanse Boojhe jaane kaa main har roz tamaashaa dekhoon Sab ziden us kee main puuree karoon har baat sunoon Ek bachche kee tarah se use hanstaa dekhoon Mujh pe chhaa jaa.e wo barsaat kee khushboo kee tarah Ang ang apna isee rut men mahaktaa dekhoon Phuul kee tarah mire jism kaa har lab khul jaa.e PankhuDee pankhuDee un honTon kaa saayaa dekhoon Main ne jis lamhe ko puujaa hai use bas ik baar Khvaab ban kar tiree aankhon men utartaa dekhoon Too miree tarah se yaktaa hai magar mere habeeb Jee men aataa hai koee aur bhee tujh saa dekhoon Toot jaa.en ki pighal jaa.en mire kachche ghaDe Tujh ko main dekhoon ki ye aag kaa Dariya dekhoon