apnii tanhaaii mire naam pe aabaad kare
— Parveen Shakir
Apnee tanhaa.ee mire naam pe aabaad kare
Kaun hogaa jo mujhe us kee tarah yaad kare
Dil 'ajab shahr ki jis par bhee khulaa dar is kaa
Wo musaafir ise har samt se barbaad kare
Apne qaatil kee zehaanat se pareshaan hoon main
Roz ik maut na.e tarz kee eejaad kare
Itnaa hairaan ho miree be-talabee ke aage
Vaa qafas men koee dar khud miraa sayyaad kare
Salb-e-beenaa.ee ke ahkaam mile hain jo kabhee
Raushnee chhoone kee khvaahish koee shab-zaad kare
Soch rakhnaa bhee jaraa.im men hai shaamil ab to
Vahee maa'soom hai har baat pe jo saad kare
Jab lahoo bol paDe us ke gavaahon ke khilaaf
Qaazi-e-shahr Kuch is baab men irshaad kare
Us kee muTThee men bahut roz raha meraa vujood
Mere saahir se kaho ab mujhe aazaad kare