baadbaan khulne se pahle kaa ishaara dekhnaa
— Parveen Shakir
Baadbaan khulne se pahle kaa ishaara dekhnaa
Main samundar dekhtee hoon tum kinaara dekhnaa
Yuun bichhaDnaa bhee bahut aasaan na thaa us se magar
Jaate jaate us kaa wo muD kar dobaara dekhnaa
Kis shabaahat ko liye aayaa hai darvaaze pe chaand
Ai shab-e-hijraan zaraa apna sitaara dekhnaa
Kya qayaamat hai ki jin ke naam par paspaa hue
Un hee logon ko muqaabil men saf-aaraa dekhnaa
Jab banaam-e-dil gavaahee sar kee maangee jaa.egee
Khoon men Duubaa huaa parcham hamaaraa dekhnaa
Jeetne men bhee jahaan jee kaa ziyaan pahle se hai
Aisee baazee haarne men kya khasaara dekhnaa
Aa.ine kee aankh hee Kuch kam na thee mere liye
Jaane ab kya kya dikhaa.egaa tumhaaraa dekhnaa
Ek musht-e-khaak aur wo bhee havaa kee zad men hai
Zindagee kee bebasee kaa isti.aara dekhnaa