baarish huii to phuulon ke tan chaak ho gae
— Parveen Shakir
Baarish huee to phoolon ke tan chaak ho ga.e
Mausam ke haath bhiig ke saffaak ho ga.e
Baadal ko kya khabar hai ki baarish kee chaah men
Kaise buland-o-baalaa shajar khaak ho ga.e
Jugnoo ko din ke vaqt parakhne kee zid karen
Bachche hamaare ahd ke chaalaak ho ga.e
Lahraa rahee hai barf kee chaadar haTaa ke ghaas
Sooraj kee shah pe tinke bhee bebaak ho ga.e
Bastee men jitne aab-gazeeda the sab ke sab
Dariya ke rukh badalte hee tairaak ho ga.e
Sooraj-dimaagh log bhee ablaagh-e-fikr men
Zulf-e-shab-e-firaaq ke pechaak ho ga.e
Jab bhee ghareeb-e-shahr se Kuch guftugoo huee
Lahje havaa-e-shaam ke namnaak ho ga.e