bajaa ki aankh men niindon ke silsile bhi nahin
— Parveen Shakir
Bajaa ki aankh men neendon ke silsile bhee naheen
Shikast-e-khvaab ke ab mujh men hausle bhee naheen
Naheen naheen ye khabar dushmanon ne dee hogee
Wo aa.e aa ke chale bhee ga.e mile bhee naheen
Ye kaun log andheron kee baat karte hain
Abhee to chaand tiree yaad ke Dhale bhee naheen
Abhee se mere rafoogar ke haath thakne lage
Abhee to chaak mire zakhm ke sile bhee naheen
Khafaa agarche hamesha hue magar ab ke
Wo barhamee hai ki ham se unhen gile bhee naheen