bakht se koi shikaayat hai na aflaak se hai
— Parveen Shakir
Bakht se koi shikaayat hai na aflaak se hai
Yahee kya kam hai ki nisbat mujhe is khaak se hai
Khvaab men bhee tujhe bhooloon to ravaa rakh mujh se
Wo ravayya jo havaa kaa khas-o-khaashaak se hai
Bazm-e-anjum men qabaa khaak kee pahnee main ne
Aur miree saaree fazeelat isee poshaak se hai
Itnee raushan hai tiree sub.h ki hota hai gumaan
Ye ujaalaa to kisee deeda-e-namnaak se hai
Haath to kaaT diye kooza-garon ke ham ne
Mo.ajize kee vahee ummeed magar chaak se hai