bichhdaa hai jo ik baar to milte nahin dekhaa
— Parveen Shakir
BichhDaa hai jo ik baar to milte naheen dekhaa
Is zakhm ko ham ne kabhee silte naheen dekhaa
Ik baar jise chaaT ga.ee dhoop kee khvaahish
Phir shaakh pe us phuul ko khilte naheen dekhaa
Yak-lakht giraa hai to jaDen tak nikal aa.iin
Jis peD ko aandhee men bhee hilte naheen dekhaa
KaanTon men ghire phuul ko chuum aa.egee lekin
Titlee ke paron ko kabhee chhilte naheen dekhaa
Kis tarah miree ruuh haree kar gaya aakhir
Wo zahr jise jism men khilte naheen dekhaa