chaarasaazon ki aziyyat nahin dekhii jaatii
— Parveen Shakir
Chaarasaazon kee aziyyat naheen dekhee jaatee
Tere beemaar kee haalat naheen dekhee jaatee
Dene vaale kee mashiyyat pe hai sab Kuch mauqoof
Maangne vaale kee haajat naheen dekhee jaatee
Din bahal jaataa hai lekin tire deevaanon kee
Shaam hotee hai to vahshat naheen dekhee jaatee
Tamkanat se tujhe rukhsat to kiyaa hai lekin
Ham se in aankhon kee hasrat naheen dekhee jaatee
Kaun utraa hai ye aafaaq kee pahnaa.ee men
Aa.ina-khaane kee hairat naheen dekhee jaatee