duaa kaa tuutaa huaa harf sard aah men hai
— Parveen Shakir
Duaa kaa TuuTaa huaa harf sard aah men hai
Tiree judaa.ee kaa manzar abhee nigaah men hai
Tire badalne ke baa-vasf tujh ko chaahaa hai
Ye e'tiraaf bhee shaamil mire gunaah men hai
Azaab degaa to phir mujh ko khvaab bhee degaa
Main mutma.in hoon miraa dil tiree panaah men hai
Bikhar chukaa hai magar muskuraa ke miltaa hai
Wo rakh rakhaao abhee mere kaj-kulaah men hai
Jise bahaar ke mehmaan khaalee chhoD ga.e
Wo ik makaan abhee tak makeen kee chaah men hai
Yahee wo din the jab ik doosre ko paayaa tha
Hamaaree saal-girah Thiik ab ke maah men hai
Main bach bhee jaaon to tanhaa.ee maar Daalegee
Mire qabeele kaa har fard qatl-gaah men hai