gulaab haath men ho aankh men sitaara ho
— Parveen Shakir
Gulaab haath men ho aankh men sitaara ho
Koi vajood mohabbat kaa isti.aara ho
Main gahre paanee kee is rau ke saath bahtee rahoon
Jazeera ho ki muqaabil koi kinaara ho
Kabhi-kabhaar use dekh len kaheen mil len
Ye kab kahaa thaa ki wo khush-badan hamaaraa ho
Qusoor ho to hamaare hisaab men likh jaa.e
Mohabbaton men jo ehsaan ho tumhaaraa ho
Ye itnee raat ga.e kaun dastaken degaa
Kaheen havaa kaa hee us ne na ruup dhaaraa ho
Ufuq to kya hai dar-e-kahkashaan bhee chhoo aa.en
Musaafiron ko agar chaand kaa ishaaraa ho
Main apne hisse ke sukh jis ke naam kar Daaloon
Koi to ho jo mujhe is tarah kaa pyaaraa ho
Agar vajood men aahang hai to vasl bhee hai
Wo chaahe nazm kaa TukDaa ki nasr-paara ho