havaa jaam e sehat tajviiz kartii hai mujhe maaluum tha

Mujhe maaloom tha Ye din bhee dukh kee kokh se phooTaa hai Meree maatamee chaadar Naheen tabdeel hogee aaj ke din bhee Jo raakh uDtee thee khawabon kee badan men Yoonhee aashufta rahegee Aur udaasee kee yahee soorat rahegee Main apne sog men maatam-kunaan Yuun sar-ba-zaanoo raat tak baiThee rahoongee Aur mire khawabon kaa pursa aaj bhee koi nahin degaa Magar ye kaun hai Jo yuun mujhe baahar bulaataa hai BaDee narmee se kahtaa hai Ki apne hujra-e-gham se nikal kar baagh men aao Zaraa baahar to dekho Duur tak sabza bichhaa hai Aur haree shaakhon pe naaranjee shagoofe muskuraate hain Mulaa.em sabz patton par paDee shabnam Sunahree dhoop men hiire kee soorat jagmagaatee hai Darakhton men chhupee naddee Bahut dheeme suron men gungunaatee hai Chamakte zard phoolon se ladee nannhee pahaaDee ke aqab men Nuqra.ee chashma khushee se khilkhilaataa hai Parind-e-khush-guloo Shaakh-e-shagufta par chahaktaa hai Ghane jangal men baarish kaa ghubaar-e-sabz Sat.h-e-sheesha-e-dil par Mulaa.em ungliyon se marhabaa ke lafz likhtaa hai Koee aataa hai Aa kar chaadar-e-gham ko baDee aahistagee se Mere shaanon se haTaa kar Saat rangon kaa dupaTTa khol kar mujh ko uDaataa hai Main khul kar saans letee huun Mire andar Koee pairon men ghunghroo baandhtaa hai Raqs kaa aaghaaz kartaa hai Mire kaanon ke aavezon ko ye kis ne chhuaa Jis se laven phir se gulaabee ho ga.ee hain Koee sargoshiyon men phir se meraa naam letaa hai Fazaa kee naghmagee awaaz detee hai Havaa jaam-e-sehat tajveez kartee hai Mujhe malum tha Ye din bhi dukh ki kokh se phuTa hai Meri matami chadar Nahin tabdil hogi aaj ke din bhi Jo rakh uDti thi KHwabon ki badan mein Yunhi aashufta rahegi Aur udasi ki yahi surat rahegi Main apne sog mein matam-kunan Yun sar-ba-zanu raat tak baiThi rahungi Aur mere KHwabon ka pursa aaj bhi koi nahin dega Magar ye kaun hai Jo yun mujhe bahar bulata hai BaDi narmi se kahta hai Ki apne hujra-e-gham se nikal kar bagh mein aao Zara bahar to dekho Dur tak sabza bichha hai Aur hari shaKHon pe naranji shagufe muskuraate hain Mulaem sabz patton par paDi shabnam Sunahri dhup mein hire ki surat jagmagati hai DaraKHton mein chhupi naddi Bahut dhime suron mein gungunati hai Chamakte zard phulon se ladi nannhi pahaDi ke aqab mein Nuqrai chashma KHushi se khilkhilata hai Parind-e-KHush-gulu ShaKH-e-shagufta par chahakta hai Ghane jangal mein barish ka ghubar-e-sabz Sath-e-shisha-e-dil par Mulaem ungliyon se marhaba ke lafz likhta hai Koi aata hai Aa kar chadar-e-gham ko baDi aahistagi se Mere shanon se haTa kar Sat rangon ka dupaTTa khol kar mujh ko uData hai Main khul kar sans leti hun Mere andar Koi pairon mein ghunghru bandhta hai Raqs ka aaghaz karta hai Mere kanon ke aawezon ko ye kis ne chhua Jis se lawen phir se gulabi ho gai hain Koi sargoshiyon mein phir se mera nam leta hai Faza ki naghmagi aawaz deti hai Hawa jam-e-sehat tajwiz karti hai