kamaal e zabt ko khud bhi to aazmaauungii
— Parveen Shakir
Kamaal-e-zabt ko khud bhee to aazmaa.oongee
Main apne haath se us kee dulhan sajaa.oongee
Supurd kar ke use chaandnee ke haathon men
Main apne ghar ke andheron ko lauT aa.oongee
Badan ke karb ko wo bhee samajh na paa.egaa
Main dil men ro.oongee aankhon men muskuraa.oongee
Wo kya gaya ki rifaaqat ke saare lutf ga.e
Main kis se rooth sakoongee kise manaa.oongee
Ab us kaa fan to kisee aur se huaa mansoob
Main kis kee nazm akele men gungunaa.oongee
Wo ek rishta-e-benaam bhee nahin lekin
Main ab bhee us ke ishaaron pe sar jhukaa.oongee
Bichhaa diyaa thaa gulaabon ke saath apna vajood
Wo so ke uTThe to khawabon kee raakh uThaa.oongee
Samaa.aton men ghane jangalon kee saansen hain
Main ab kabhi tiree awaaz sun na paa.oongee
Javaaz DhoonD raha thaa na.ee mohabbat kaa
Wo kah raha thaa ki main us ko bhuul jaa.oongee