kuch to havaa bhi sard thii kuch tha tiraa khayaal bhi
— Parveen Shakir
Kuch to havaa bhee sard thee kuch tha tiraa khayaal bhee
Dil ko khushee ke saath saath hota raha malaal bhee
Baat wo aadhee raat kee raat wo puure chaand kee
Chaand bhee 'ain chait kaa us pe tiraa jamaal bhee
Sab se nazar bachaa ke wo mujh ko kuch aise dekhtaa
Ek daf'a to ruk ga.ee gardish-e-maah-o-saal bhee
Dil to chamak sakegaa kya phir bhee tarash ke dekh len
Sheesha-giraan-e-shahr ke haath kaa ye kamaal bhee
Us ko na paa sake the jab dil kaa 'ajeeb haal tha
Ab jo palaT ke dekhiye baat thee kuch muhaal bhee
Meree talab tha ek shakhs wo jo nahin milaa to phir
Haath du'aa se yuun giraa bhuul gaya savaal bhee
Us kee sukhan-taraaziyaan mere liye bhee Dhaal thiin
Us kee hansee men chhup gaya apne ghamon kaa haal bhee
Gaah qareeb-e-shaah-rag gaah ba.eed-e-vahm-o-khvaab
Us kee rafaaqaton men raat hijr bhee tha visaal bhee
Us ke hee baazuon men aur us ko hee sochte rahe
Jism kee khvaahishon pe the ruuh ke aur jaal bhee
Shaam kee naa-samajh havaa poochh rahi hai ik pataa
Mauj-e-havaa-e-koo-e-yaar kuch to miraa khayaal bhee