mushkil hai ki ab shahr men nikle koi ghar se
— Parveen Shakir
Mushkil hai ki ab shahr men nikle koi ghar se
Dastaar pe baat aa ga.ee hotee huee sar se
Barsaa bhee to kis dasht ke be-faiz badan par
Ik 'umr mire khet the jis abr ko tarse
Kal raat jo eendhan ke liye kaT ke giraa hai
ChiDiyon ko baDaa pyaar thaa us booDhe shajar se
Mehnat miree aandhee se to mansoob nahin thee
Rahnaa thaa koi rabt shajar kaa bhee samar se
Khud apne se milne kaa to yaaraa na thaa mujh men
Main bhiiD men gum ho ga.ee tanhaa.ee ke Dar se
Be-naam masaafat hee muqaddar hai to kya gham
Manzil kaa ta'ayyun kabhi hota hai safar se
Pathraayaa hai dil yuun ki koi ism paDhaa jaa.e
Ye shahr nikaltaa nahin jaadoo ke asar se
Nikle hain to raste men kaheen shaam bhee hogee
Sooraj bhee magar aa.egaa is raah-guzar se