sabhii gunaah dhul gae sazaa hi aur ho gaii
— Parveen Shakir
Sabhee gunaah dhul ga.e sazaa hee aur ho ga.ee
Mire vajood par tiree gavaahee aur ho ga.ee
Rafoo-garaan-e-shahr bhee kamaal log the magar
Sitaara-saaz haath men qabaa hee aur ho ga.ee
Bahut se log shaam tak kivaaD khol kar rahe
Faqeer-e-shahr kee magar sadaa hee aur ho ga.ee
Andhere men the jab talak zamaana saaz-gaar thaa
Charaagh kya jalaa diyaa havaa hee aur ho ga.ee
Bahut sambhal ke chalne vaalee thee par ab ke baar to
Wo gul khile ki shokhee-e-sabaa hee aur ho ga.ee
Na jaane dushmanon kee kaun baat yaad aa ga.ee
Labon tak aate aate bad-duaa hee aur ho ga.ee
Ye mere haath kee lakeeren khul rahee thiin yaa ki khud
Shagun kee raat khushboo-e-hinaa hee aur ho ga.ee
Zaraa see kargason ko aab-o-daana kee jo shah milee
Uqaab se khitaab kee adaa hee aur ho ga.ee