shauq e raqs se jab tak ungliyaan nahin khultiin
— Parveen Shakir
Shauq-e-raqs se jab tak ungliyaan naheen khulteen
Paanv se havaaon ke beDiyaan naheen khulteen
PeD ko duaa de kar kaT ga.ee bahaaron se
Phuul itne baDh aa.e khiDkiyaan naheen khulteen
Phuul ban ke sairon men aur kaun shaamil thaa
Shokhi-e-sabaa se to baaliyaan naheen khulteen
Husn ke samajhne ko umr chaahiye jaanaan
Do ghaDee kee chaahat men laDkiyaan naheen khulteen
Koee mauja-e-sheereen chuum kar jagaa.egee
Soorajon ke nezon se seepiyaan naheen khulteen
Maan se kya kahengee dukh hijr kaa ki khud par bhee
Itnee chhoTee umron kee bachchiyaan naheen khulteen
Shaakh shaakh sargardaan kis kee justujoo men hain
Kaun se safar men hain titliyaan naheen khulteen
Aadhee raat kee chup men kis kee chaap ubhartee hai
Chhat pe kaun aataa hai seeDhiyaan naheen khulteen
Paaniyon ke chaDhne tak haal kah saken aur phir
Kya qayaamaten guzreen bastiyaan naheen khulteen