terii khushbuu kaa pataa kartii hai

Teree khushboo kaa pataa kartee hai Mujh pe ehsaan havaa kartee hai Chuum kar phuul ko aahista se Mo.ajiza baad-e-sabaa kartee hai Khol kar band-e-qabaa gul ke havaa Aaj khushboo ko rihaa kartee hai Abr barse to inaayat us kee Shaakh to sirf duaa kartee hai Zindagee phir se fazaa men raushan Mish.al-e-barg-e-hinaa kartee hai Ham ne dekhee hai wo ujlee saa.at Raat jab sher kahaa kartee hai Shab kee tanhaa.ee men ab to aksar Guftugoo tujh se raha kartee hai Dil ko us raah pe chalnaa hee nahin Jo mujhe tujh se judaa kartee hai Zindagee meree thee lekin ab to Tere kahne men raha kartee hai Us ne dekhaa hee nahin varna ye aankh Dil kaa ahvaal kahaa kartee hai Mus.haf-e-dil pe ajab rangon men Ek tasveer banaa kartee hai Be-niyaaz-e-kaf-e-Dariya angusht Ret par naam likhaa kartee hai Dekh too aan ke chehra meraa Ik nazar bhee tiree kya kartee hai Zindagee bhar kee ye taakheer apnee Ranj milne kaa sivaa kartee hai Shaam paDte hee kisee shakhs kee yaad Koocha-e-jaan men sadaa kartee hai Mas.ala jab bhee charaaghon kaa uThaa Faisla sirf havaa kartee hai Mujh se bhee us kaa hai vaisaa hee sulook Haal jo teraa anaa kartee hai Dukh huaa kartaa hai Kuch aur bayaan Baat Kuch aur huaa kartee hai