charaag hoon kab se jal raha hoon mujhe duaaon men yaad rakhiye
— Pirzada Qasim
Charaagh hoon kab se jal raha hoon mujhe duaaon men yaad rakhiye
Jo bujh gaya to sahar-numaa hoon mujhe duaaon men yaad rakhiye
Wo baat jo aap kah na paa.e miree ghazal men bayaan huee hai
Main aap kaa harf-e-mudda.aa hoon mujhe duaaon men yaad rakhiye
Ghubaar hoon aap chaahe ghaaza banaa.en yaa zer-e-paa bichhaa len
Main kab se raqsaan hoon thak chukaa hoon mujhe duaaon men yaad rakhiye
Bahut hee shaa.istagee se har lamha Doobtee ik sadaa kee soorat
Main khalvat-e-jaan men bujh raha hoon mujhe duaaon men yaad rakhiye
Balaa se ye raah-e-shauq meree na ho sakee par tumhaaree khaatir
Misaal-e-naqsh-e-qadam bichhaa hoon mujhe duaaon men yaad rakhiye