dil agar Kuch maang lene ki ijaazat maangtaa

Dil agar Kuch maang lene kee ijaazat maangtaa Ye mohabbat-zaad tajdeed-e-mohabbat maangtaa Vaqt khud naa-paa.edaaree ke liye mash.hoor hai Aise be-taufeeq se main khaak shohrat maangtaa Main ne sahraa se tahayyur-khez hairat maang lee Khaak ho jaataa agar tahzeeb-e-vahshat maangtaa Dil ko khush aa.ee nahin ye daulat-e-aasoodgee Aur Kuch mil jaatee to ye Kuch aur zahmat maangtaa Hain khudaavandaan-e-Dunya ham tahee-daston se hech Dil ko hasrat thee to ham jaison se khil.at maangtaa Ho gaya hota giraan-goshon se gar maghloob main Kyuun sukhan aaghaaz kartaa kyuun samaa.at maangtaa Kya ta.ajjub thaa ki is sauda-garee ke daur men Khvaab bhee ta.abeer ho jaane kee qeemat maangtaa