kabhi havaa to kabhi khaak e rahguzar honaa
— Pirzada Qasim
Kabhi havaa to kabhi khaak-e-rahguzar honaa
Mire naseeb men likkhaa hai dar-ba-dar honaa
Agar chalo to mire saath hee chalo lekin
KaThin safar se ziyaada hai ham-safar honaa
Udaas udaas ye deevaar-o-dar bataate hain
Ki jaise raas na ho un ko meraa ghar honaa
Qadam uThe bhee nahin aur safar tamaam huaa
Ghazab hai raah kaa itnaa bhee mukhtasar honaa
Ye daur-e-kam-nazaraan hai to phir hunar kaa ziyaan
Jo ek baar na honaa to beshtar honaa