khirman e jaan ke liye khud hi sharar ho gae ham

Khirman-e-jaan ke liye khud hee sharar ho ga.e ham Khaaksaaree jo baDhee khaak-basar ho ga.e ham Apne hone kaa yaqeen aa gaya bujhte bujhte Be-karaan shab men jo imkaan-e-sahar ho ga.e ham Naa-muraadee men nashaat-e-gham imkaan thaa ajab Ham kabhi shaad na ho paate magar ho ga.e ham Ham nahin Kuch bhee magar maarka-e-ishq kee khair Jiit maqsoom huee us kee jidhar ho ga.e ham Jaada-e-ishq tiraa haq to adaa kis se huaa Khair itnaa hai ki aaghaaz-e-safar ho ga.e ham Zindagee aise guzaaree ki subuk sar na hue Yaanee is daur men jiine kaa hunar ho ga.e ham Tesha bhee ham the yaqeen ham the to zindaan kya chiiz Yahee honaa thaa so deevaar men dar ho ga.e ham Dast-e-qudrat hamen Kuch aur hai bannaa so banaa ChhoD ye zikr ki qatre se guhar ho ga.e ham