Khoon se jab jalaa diyaa ek diyaa bujhaa huaa
— Pirzada Qasim
Khoon se jab jalaa diyaa ek diyaa bujhaa huaa
Phir mujhe de diyaa gaya ek diyaa bujhaa huaa
Apne to ahad-e-shauq ke marhale sab ajiib the
Ham ko visaal saa lagaa ek diyaa bujhaa huaa
Ek hee daastaan-e-shab ek hee silsila to hai
Ek diyaa jalaa huaa ek diyaa bujhaa huaa
Sho.ala havaa-nazhaad tha phir bhee havaa ke haath ne
Bas yahee faisla likhaa ek diyaa bujhaa huaa
Mahfil-e-rang-o-noor kee phir mujhe yaad aa ga.ee
Phir mujhe yaad aa gaya ek diyaa bujhaa huaa
Mujh ko nashaat se fuzoon rasm-e-wafa aziiz hai
Meraa rafeeq-e-shab raha ek diyaa bujhaa huaa
Dard kee kaa.enaat men mujh se bhee raushnee rahi
Vaise meree bisaat kya ek diyaa bujhaa huaa
Sab miree raushni-e-jaan harf-e-sukhan men Dhal ga.ee
Aur main jaise rah gaya ek diyaa bujhaa huaa