koi hai jo shikast e zabt e gam hone nahin deta
— Pirzada Qasim
Koi hai jo shikast-e-zabt-e-gham hone nahin deta
Main ronaa chaahtaa hoon aur wo rone nahin deta
Sar-e-aaghaaz har shab ik nayaa gham gher letaa hai
Jo khud bhee jaagtaa hai aur mujhe sone nahin deta
Na.e gham bakhshtaa hai dil ko bahlaa.e bhee jaataa hai
Gharaz wo aitbaar-e-gham kabhi khone nahin deta
Bahut jee chaahtaa hai khud ko ab ro len sar-e-hastee
Koi hai jo ye rasm-e-gham adaa hone nahin deta
Ajab ik sho.ala-e-gham fasl-e-ulfat phoonk deta hai
Na.ee ik fasl phir bo.en magar bone nahin deta