main kab se apnii talaash men hoon milaa nahin hoon
— Pirzada Qasim
Main kab se apnee talaash men hoon milaa nahin hoon
Savaal ye hai ki main kaheen hoon bhee yaa nahin hoon
Ye mere hone se aur na hone se munkashif hai
Ki razm-e-hastee men kya hoon main aur kya nahin hoon
Main shab nizhaadon men sub.h-e-fardaa kee aarzoo hoon
Main apne imkaan men raushnee hoon sabaa nahin hoon
Gulaab kee tarah ishq meraa mahak raha hai
Magar abhee us kee kisht-e-dil men khilaa nahin hoon
Na jaane kitne khudaaon ke darmiyaan hoon lekin
Abhee main apne hee haal men hoon khuda nahin hoon
Kabhi to iqbaal-mand hogee miree mohabbat
Nahin hai imkaan koi magar maantaa nahin hoon
Havaaon kee dastaras men kab hoon jo bujh rahoongaa
Main isti.aara hoon raushnee kaa diyaa nahin hoon
Main apnee hee aarzoo kee chashm-e-malaal men hoon
Khulaa hai dar khvaab kaa magar dekhtaa nahin hoon
Udhar tasalsul se shab kee yalghaar hai idhar main
Bujhaa nahin hoon bujhaa nahin hoon bujhaa nahin hoon
Bahut zarooree hai ahd-e-nau ko javaab denaa
So teekhe lahje men boltaa hoon khafaa nahin hoon