na puuchhiye ki kahaa kya hai an kahii kya hai
— Pirzada Qasim
Na poochhiye ki kahaa kya hai an-kahee kya hai
Azaab jhel raha hoon sukhanvaree kya hai
Ajab hai zauq-e-tamaashaa ki ghar jalaa kar log
Ye chaahte hain samajhnaa ki raushnee kya hai
Pas-e-nazar ho agar maqsad-e-hayaat to phir
Ye ziist vaqt guzaaree hai zindagee kya hai
Main multajee hoon na wo multafit magar phir bhee
Ye ek aag dilon men lagee huee kya hai
Main dil ke daagh dikhaa.oon ki zakhm-e-sar un ko
Jo poochhte hain ki mafhoom-e-dostee kya hai