shikast e dil men bhi ik zindagii nazar aaii
— Pirzada Qasim
Shikast-e-dil men bhee ik zindagee nazar aa.ee
Diyaa bujhaa to hamen raushnee nazar aa.ee
Faraaz-e-daar pe koi hamen na pahchaanaa
Zamaane vaalon ko khush-qaamatee nazar aa.ee
Sar-e-dayaar-e-wafa doston ke jhurmuT men
Dareeda jism liye dostee nazar aa.ee
Ab aur tarz se naqqaara-e-khuda goonje
Zabaan-e-khalq to khaamosh hee nazar aa.ee
Wo rakh-rakhaav na dekhaa diye ke jalne men
Jo us ke bujhne men shaa.istagee nazar aa.ee