us ki khwaish hai yahii harf e vazaahat ke bagair
— Pirzada Qasim
Us kee khwaish hai yahee harf-e-vazaahat ke baghair
Ab koi khvaab bhee dekhe na ijaazat ke baghair
Ham ko DhoonDo to hamen khone kee khaatir DhoonDo
Khvaab ta.abeer nahin hote hain hasrat ke baghair
Dil ko ik kaar-e-musalsal ne rakhaa hai aabaad
Ek lamha bhee nahin guzraa mohabbat ke baghair
Yuun bhee dushvaar hai aasooda-e-sahraa honaa
Aur jab khaak bhee ho jaanaa ho vahshat ke baghair
Waqt saffaak hai itnaa kabhi sochaa bhee na tha
Ham use yaad na kar paa.enge zahmat ke baghair
Ham tire qarya-e-jaan-taab men itnaa Thahre
Ya.anee ik lamha guzaar aa.e hain ujlat ke baghair
Ab to ham khud se bhee kam-kam hee milaa karte hain
Kisee khwaish se alag aur zaroorat ke baghair